ایکی شعر
عمران صلاحی
عمران صلاحی تهراندا دونیایا گلدی. آتاسی باکی لی، آناسی اردبیل لی دیر. ساده گؤرونن بو دوروم اونون یارادیجی لیغینا اؤنملی اؤلچوده تاثیرلی اولدو. تحصیل ایللرینده فارس دیلینین کلاسیک شاعیرلرینی، اونلارین صنعت کارلیق سیرلرینی اؤیره ندی. عاییله ایچینده ده اؤزه للیک له آتاسینین یاردیمی ایله آذربایجان تورکجه سینین درین قاتلارینا، موسیقی و آهنگینه نفوذ ائتدی. شاعیرلیگه یازدیغی ساتیریک شعرلرله باشلادی. او خالق حیاتینی شعرینین بؤیوک قایناغی اولاراق منیمسه میشدی. تانینمیش شاعیر مرتضی مجدفر، عمران صلاحی – نین "پنجره دن داش گلیر" آدلی کیتابینا یازدیغی اؤن سؤزده بئله دئییر: " صلاحی، سؤزلو خالق ادبیاتینین توکنمه ین قایناقلاریندان بسله نن، کلاسیک ادبیاتیمیزین اه ن گؤزه ل گله نک لریندن یارانان، حادیثه لری یئنی شرطلر ایچینده دوام ائتدیره ن و گلیشدیره ن صنعت چی لریمیزدن بیری دیر. " شاعیرلییی نین ایلک دؤنه مینده "بچه جوادیه" مخلصی ایله یازدیغی شعرلره بَللی بیر هومانیسم، گولوش و خوش گؤرو حاکیم دیر. عمران ین آذربایجان تورکجه سی ایله یازدیغی شعرلری موضوع و ادبی – بدیعی سوییه سی باخیمیندان اوخوجولارین دیقتینی داها چوخ چکمیش دیر. صلاحی، آنا دیلینده یازدیغی شعرلری "پنجره دن داش گلیر" آدلی کیتابیندا توپلامیشدیر. . قایناق: ادبیات اوجاغی، بیرینجی جیلد، تبریز 1985 .
____________
. فدایی
اونلار گلنده
– من دونیایا گلمه میشدیم.
من دونیایا گلنده، اونلار گئتمیشدیلر.
من اونلاردان بیر زاد بیلمیرم.
اونلاردان، هم یاخشی، هم پیس یازیب لار.
اونلار دوز یول گئدیب لر یا آزیب لار؟
بیلمیرم.
اما بونو بیلیرم کی،
او زامان فدایی لر وار ایمیش.
کیملردن ایمیش لر؟
دئیه جکسن، کتلی دن، کوفلودن.
قوربان اولوم کتلی لرین الینه.
قوربان اولوم کتلی لرین دیلینه.
اللری بیرمیش. دیللری بیرمیش.
اونلار گئتدیلر،
اما من گؤرورم یاغیش یاغیب،
بیر قوجا اکینچی، دوروب دوماندا.
قابارلی الینده بئلی – گؤیه ریب توفنگ اولاجاق
. ..
. آییق
سحر یاتیب،
آی ایشیغی تور آتیب.
ائولر تورا دوشوب لر گئجه نین،
بالیق لاری ایری – ایری، منیم هوشوم،
حواسیم بالیق لارین بیری دیر.
تکه – توک ائولرده ایشیق یانیر.
منیم گؤزوم بویانیر پیچیلتی لار قاناد چالیر،
یاواش قونور ایشیغین بوداغینا.
قیزیل عشق،
منی – پنجه سینه آلیب آپاریر "قاف داغینا".
گئجه فه نار الینده،
